الاثنين، 19 أكتوبر 2009

أسرى الخدم


السلام عليكم اشلونكم اخواني وخواتي ادري غمنده هانم قديمه اخر موضوع لي كان عن العيد والله فشله

المهم حبيت اكتب عن شغلى حارتني وايد وأهيا الخدم واليهال الخدم و حشاشة يوفنا حشاشة يوفج يالي حملتي 9 أشهر جربتي حلاوة الولادة

وقلتي بغيت أموت وأخر شي مكبره المخده ونايمه ولا طالعه وقاطه يوفج على قولتج عند معذبينهم الخدم

انا بعرف شي واحد يا بعض من يدعي الأمومه اشلون تخلين الخدامه اهيا الأم البديله بالكامل بالكامل يعني توكل - تشرب الدوا -تلعب مع الياهل الله وأعلم شنو اللعب _ وأخر شي ينام عندها بليل

أدري البعض راح يقول كلش غمنده هانم ماعندها خدامه ولا تبالغ وايد انا اقول الخدم مهمين بس مو لي درجة انها تلغي وجودي كأم والخدامه اييبها كفوها تغسل ملابس وتكرمون الحمامات مو تغسل وتربي حشاشة يوفي مافي مانع اتشوف الياهل بس مو لي درجة التعلق الياهل لازق برقبتها يتنشقها تنشق الله يعينه وأهيا ياية من بيئه الله واعلم اشلون انا ماراح اتكلم عن بلا ويهم الكل عارفها بس في ملاحظه عندي ليش لما الأم يمال الكسار تدز الخدامه للفروع بالقوايل لازم يكون معاها الياهل سواء بنت يفقصونها السواويق او ولد عيزانه تشوف حشاشة يوفها 10 دقايق

انا استغرب الصراحه لما اشوف السايق بالهده أهو اللي ياخذ البنت من الروضه لا ويشيلها على جتفه ما الحكمة لا أعلم ؟؟؟؟؟

وفي سالفة ضحكتني وحدة تقولي وأهيا اكبيرة ألحين أم إعيال تقول انا للحين اذكر خدامتنا إلي عندنا 10 سنين كانت كل يوم وانا صغيرة توكلني قفشة كركم ناعم الله واعلم كان كركم ولا شي ثاني ؟؟

انا اقول فكوا يا أباء ويا أمهات قواطي الروب أمهات العازه قيود أسرى الخدم اعيالكم ......

والله يكفينا شرهم يارب

الجمعة، 25 سبتمبر 2009

تهنئه


السلام عليكم غمنده هانم تحييكم



عساكم من عواده جميعا وكل عام وانتوا بالف خييير


وردينه للدوام والطلاب وسوالفهم والله يعينا ويعينكم

الأحد، 6 سبتمبر 2009

ااااااااااااااااااااااااااااااااااااااااه يالقهر


السلام عليكم اخواني اخواتي اكتب البوست وانا مقهوره

اليوم اول يوم لدوام هيئة المقاريد التدريسيه واليوم ادركت فعلا انا لازم اخاف من شي اسمه انفلونزا الخنازير اليوم الدراسي غييييييييييييييير من جميع المقاييس الناس خايفه ولابسين كمامات ومايسلمون إلا بالمصافحه ومن بعيد والله على الجاليه الي واصلين من بره طازه الفير طابين الساعه 8 امداومين معانا يعني لا فحص ولا بطيخ وطبعا ابله غمنده خلصت باكيت ديتول المقم من كثر ما امسح ايدي وان مرت عامله من الي يتسدحون بالجليب يم غرفتنا كلنا طقينا لثمه والوضع بايخ جدا ومضحك نفس الوقت وألي يحر بالموضوع من الصبح يايين مدرستنا دكاتره من وزارة الصحه مختارين مدرستا يسوون فيها دورات تدريبيه للمعلمات اشلون انتعامل مع الحاله المرضيه ما ادري احنا شكو اااااااااااااااااااخ على وزاره التربيه اااااااااااااااااااااه ميته من القهر منها يعني بيتغير مسماي الوظيفي من ابله غمنده إلي.............. سستر غمنده هانم والله حرام يكو من خططنا التعليميه انا انبخر الغرفه بالياوي واللبان الذكر رايحين المدرسه انحظر للأرواح مو ادروسنا

والله الوضع كلش مو مريح موت يالخطط ياوزاره التربيه يبون كل مرحله لها فرصه ومايبون طابور صباح ومايبون مقصف عيل ليش تخلونهم يداومون يمال..........على قولت يدتي والله مصاخه كل دول الخليج موقفين المدارس لمدة 4 اشهر ألا احنا على راس مناهجنا الفاشله ريشه من زينهم عاد وويييييييييع

اصار فينا بسنن الدمج بالغزو كانا خلصنا وصرنا وكبرنا واتخرجنا وله هالجيل الي مايعرف كوعه من بوعه غيييييييييييييييييير

والله للحين محتره واقووووووووووووول اااااااااه يالقهر

الثلاثاء، 1 سبتمبر 2009

المقاريد


السلام عليكم اخواني واخواتي اكتب البوست وانا كلي حزن وكآبه .......................

الأسبوع القادم لازم احنا المقاريد انداوم بالمدارس ويسمونا الهيئه التدريسيه ...

طبعا أول سنه اداوم العام الدراسي اليديد وما اجهز عدة المدرسه قلم احمر , اقلام لوح , وغيرها من الأدوات الي تاخذ ربع الراتب ولله الحمد

هالمره غير غيييييير العدة مكونه من:

* كمام ويفضل اشواريا فسكي

* ديتول الجل

* مناديل ديتول

*صابون سائل

* كرت يتعلق على الملابس مكتوب عليه ممنوع البوس واللم بليييييييز

والله ياناس صج خايفين اشلون انداوم والمرض منتشر يكافينا الشر والأوادم اتموت واحنا بالمدارس عندنا العاملات من هالجنسيات الي يتسدحون بالجليب والحساوي مابقى فايروس مو لاقطينه والله صج خايفه عاد احنا المعلمات لازم تاخذج بالحضن وخصوصا من جنسيات معينه ما اتكفيها بوسه وحده لا لازم تكسر الحنج يالله ترتاح والله خايفه

حرام عليهم والله ماراح يصير عندنا تركيز وقت الشرح واذا وحده من الطالبات اعطست ببجي واطلع بره الصف

الله يحفظنا يارب من كل شر

الأحد، 30 أغسطس 2009

اشفيهم بناتنا؟؟


اااااااااااااااااااااااااه من القلب والله المرأه اطلبت المساواه بينها وبين الرجل ووصلت للي تبيه ولله الحمد.................

اوصلت واوصلت وللحين اتكافح عشان اداحر الريال بكل شي .......

انا مو ضد المرأه انا ضد المساواه إلي ازايده عن اللزوم وفوق المألوف المساواه الي خلت المرأه الداحر الريال لا واتعداه بعد ...تأثير هالمساواه الي بناتنا افهموها غلط اوصلت الدراسات انا البنات صاروا ما يستحون هالوقت البنت اهيا اتخز الولد واتكاسره بعد تمشي واهيا عندها ثقه عاليه جدا بنفسها جنها تقول فيك خير قرب البنت تخلت عن وايد رموز ترمز انها انثى ومن اهم هذي الرموز الحياء على قولت اهلنا بين الحيا والوقاحه شعره... والله اني اشوف كل يوم تصرفات بنات بحكم اني معلمه ثانوي اشوف امور والله استحي منها ابي اقولكم موقف اول انتقلت للتدريس بمدرسه يديده كل العاده نطلع بالفرص نشرف على البنات جنه نقدر على بلاويهم وانا ماشيه اراقب جني شرطي الفريج اشوف وحده اترامشلي بعينها قلت اشفيها وي مسكينه اعيونها اتمر يمي وجني وحده من ربعها وبكل قوه تقولي هلا هلا بالحب انا لاشعوريا استحيت مع اني ابله وخفت الصراحه وحاشني عقر بقر ورديت الغرفه قلت حق زميلاتي ردو علي بكل برود قالولي ماشفتي شي

وفعلا ما شفت شي هذا ابسط شي ممكن اقوله وعلى فكره البنت عاديه يعني لا بويه ولا شي بعرف المساواه الزايده وصلت بناتنا لبعد الخط ألي بين الحيا والوقاحه والجرأه البايخه والله كل يوم احتر لما اشوف بعض وانا قلت بعض البنات الي يفصخون عباة الحيا ويحسبونه دقه قديمه على فكره يابناتنا الحيا مطلوب مطلوب جدا بس رجاء رجاء حار بدون تصنع وله اقول ميخالف يبه مثلوا الحيا الله يخليكم وبسكم امداحر الرياييل
وألحين بعرف رايكم ؟؟هل اصبحنا في زمن نفتقر للحياء ؟؟هل من يتصف بكل معاني الحياء في زمننا هذا يُعتبر رجعي ومتخلف ؟؟ام تغير مفهوم الحياء واصبح مجرد كلمة تقال ؟؟

الجمعة، 28 أغسطس 2009


صج حظوظ اي هذا الحظ الحظ لي قام قام

مالي حظ بالهدنيا ...........

هذي عبارات وايد نسمعها وبشكل اكبير هالعبارات عبارات سلبيه بشكل كامل اتخلي الشخص يوقف مكانه ويشوف الناس وين توصل ويقول ايييي الدنيا حظوظ وانا مالي حظ.....

انا اقول الحظ شي ملك للجميع والكل ممكن يحصل عليه لأنه الحظ من صنع الأنسان بنفسه لا تنتظر متى تربح ورقه اليانصيب ورقه الحظ اصنعها بنفسك بالهدنيا وراح تشوف ان الناس بترد وتقول حظه قايم والحقيقه ان الأنسان يصنع حظه بنفسه.

اصنع حضك بنفسك.

الاثنين، 24 أغسطس 2009

التقمص بدايه النهايه

الناس مواهب وقدرات وطاقات وفي كل مكان تجد هذه الفروقات واضحه والله سبحانه حكيم (وهو الذي جعلكم خلائف الأرض ورفع بعضكم فوق بعض درجات) فمن ايات الله عزوجل اختلاف صفات الناس ومواهبهم فمثلا وهو خير مثال رسولنا الكريم صلى الله عليه وسلم وظف أصحابه حسب قدراتهم فعلي للقضاء ومعاذ للعلم وخلد للجهاد..... والكثير
لماذا اذن في الوقت الحالي نعمل على تقمص شخصيات الغير وننافسهم على انفسهم ،الذوبان بالغير انتحار وتقمص صفات الغير قتل متعمد لذاتي ،إن التقليد الأعمى إلغاء متعمد للتميز والتفرد المقصود من الخليقه اذا هو بدايه النهايه.
يامن أفرط في الإنصهار في شخصيات الغير لا تعارض الخليقه وإبدأ من جديد وإصنع نفسك بنفسك لتكون شخصيه يطمح بالوصول إليها .